Ituo goda 3. decembrī, 17 stuņdēs nūtiks puorsoku diska prezentaceja – latgalīšu puorsoku vokors Kuorsovā, Kuorsovys pylsātys bibliotekā (Tautys nomā) Vokora cielīnī storp dorba i gulietīšonys laiku raudzeisim atrast breivu šaļteņa latgalīšu puorsokom, čaja kruškai i kaidam muzykalam puorsteigumam – tys vyss, kab īpazeistynuotu interesentus ari Kuorsovā ar latgalīšu puorsoku disku i pošu īraksteitū tautys boguoteibu – latgalīšu puorsokom.

 

Medeji jau tikušs informāti, ka diskā īraksteita 31 puorsoka i tuos īrunuojuši – muziki (Aigars Runčis, Artūrs Uškāns, Gunārs Igaunis, Guntra Kuzmina, Alvis Bernāns, Juris Vucāns, Ilmārs Dreļs u.c.), rakstnīki, dzejnīki (Valentīns Lukaševičs, Oskars Orlovs, Līga Rundāne), artisti (Kristaps Rasims, Andris Rudzinskis) i cyti kulturys i sabīdriskī aktivisti. Īraksteituos puorsokys vairuoku godu garumā, teikūtīs ar teiciejim vysaiduos Latgolys vītuos, savuokuse kulturys darbineica i tradicionaluos kulturys tradiceju turātuoja Iveta Dukaļska.
 
“Latgalīšu puosokys i puorsokys” izdevuse bīdreiba “Latgolys Producentu Grupa”. Īroksta mierkis ir padareit pīejamuoku itū latgalīšu mutvuordu folklorys dali ikvīnam i tū aktualizēt vysā nūvodā.

 

Puorsoku vokors Kuorsovā ir vīns nu latgalīšu puorsoku prezentacejis pasuocīņu serejis. Latgalīšu puorsokys jau skaiteitys Viļakys nūvoda Upītē, Rēzeknē i Reigā.

 

“”Peiksti voi napeiksti, ak muote sacē, ka juosaklausa, ta juosaklausa irā!” tai nadaudz puorfrazejūt vīnu nu puorsokom var sacēt par izdūtū disku. Juosaklausa, kab sajustu latgalīšu izlūkšņu boguoteibu, nūvoda eipatneibys i latgalīšu dzeivis gudreibu”, atzeist īroksta izdevieji.

 

Teikamīs 3. decembrī Kuorsovā!